Eldiń eńbek qoǵamyna aınalýy úshin daýys berdim  

Men – qarapaıym eńbek adamymyn. Biraq jas kezimde eldiń saıası ómirine aralastym. Sondyqtan qazir jas kelse de eldiń saıası, ekonomıkalyq, áleýmettik jaǵdaıynyń barlyǵyn qadaǵalap otyramyn. Bizdiń eldegi syndarly saıasattyń arqasynda Qazaqstan búgin­gideı zor dárejege jetti. Aı­nalamyzdaǵy memleketterdegi beıberekettikti estip, kórip otyryp, óz elimdegi baýyrmal tynysh­tyq úshin táýbe etip otyramyn. Halyqaralyq jaǵdaıdyń qyl­pyldap, ekonomıkalyq daǵdarys búkil dúnıeni býyp turýyna baılanysty bizdiń elde de tyndyrylatyn kóp istiń barlyǵyn Elbasy aıtqan bolatyn. Halqymyz «basshy durys bolmaı, qos túzelmeıdi» deıdi. Halyq beker aıtpaıdy. Aınalamyzda memleket tizginin ustaǵandardy qýyp shyqqandardy da kórdik. Kóregen, dana basshy ǵana halqyn qıyn-qystaýdan alyp shyǵady. Onyń da kýásimiz. Sondyqtan qıyn kezde, aldymen Memleket basshysyn tańdap alý kerek boldy. Bizdegi kezekten tys Prezıdent saılaýy der ýaqytyndaǵy sheshim ekeninde daý joq. Men Qostanaı qalasyndaǵy ózim daýys beretin №31 saılaý ýchaskesine tústen keıin bar­dym. Sonyń ózinde saılaýshy­lar legi tolastamapty, lek-legimen kelip jatty. Aınalaıyn, halqymnyń birligine, Otanymyzdyń bola­shaǵyn árkim óz bala-shaǵasynyń bola­shaǵy dep túsingen jaýap­ker­shiligine rıza boldym. «Birlik bolmaı, tirlik bolmaıdy». Atalarymyz attyń jalynda, túıeniń qomynda júrip qorǵap, tastap ketken jerdi túletý ár ur­paq­tyń qasıetti paryzy bolmaq. Sol úshin eńbek etý kerek. Eńbek bolmasa adam azady, jer tozady. Men zeınetkerlikke shyqqansha traktordan túsken joqpyn. Balalarymdy da eńbekke baýlydym. Búgingi saılaýda ul-qyzdarym, kelinderim men kúıeý balalarym, nemerelerim – bir áýlet bolyp daýys bergenimizdi maqtan tutamyn. Saılaýda men eldiń tynysh­tyǵy men birligi úshin daýys berdim, tańdaýymdy jasadym. Biz­diń elimizde eńbek etý úshin barlyq jaǵdaı jasalǵan, eń bas­tysy, alakózdik joq, birlik, ult pen etnostar arasyndaǵy adamı syılastyq bar. Tynyshtyq barda etken eńbektiń qaıtarymy ámanda bolady. Men daýys berip turyp sony oıladym. Kámshat DО́NENBAEVA, Sosıalıstik Eńbek Eri. QOSTANAI.